Improve Sleep. Discussion 2

Քննարկում 2։ Քնի միջավայր

Նկարը՝ Ջեքի Մորիս, «Պատմի՛ր ինձ մի վիշապ»

Մուտք

Հանդիպումը սկսե՛ք ծանոթությունից։ Թեև ուսանողների հետ արդեն առցանց շփում եղել է, սակայն սկսե՛ք նրանից, որ յուրաքանչյուրը կիսում է իր անունը և թե ինչն է նրանց ամենաշատը գրավել ընթերցանյութի մեջ՝ միգուցե մի դեպք, կամ անձ, կամ միտք։ Մարզիչը կարող է առաջինը օրինակ ծառայել։ Այդ ժամանակ մարզիչը նաև նշում է ուսանողների ներկայությունը։ Սա չպետք է տևի ավելի քան 3-5 րոպե։

Քննարկումները տևում են 75 րոպե։ Եթե մարզիչը զգում է, որ քննարկումը ձգձգվում է, ապա փորձում է ավարտել այն քննարկում-վարժությունը, որը սկսել են և միաժամանակ ավարտել հանդիպումը։

Քննարկումները դասավորված են ըստ կարևորության հերթականության, այսինքն վերջին քննարկումների կարևորությունն ավելի ցածր է և դրանք չհասցնելու դեպքում որակային վնասները շատ չեն։

0. Վերհիշում-Վարժություն

Թիրախավորվող հմտություններ
Կառուցողական մտածողություն
Տևողություն՝ 5 րոպե

Առաջադրանքի ներկայացում
Մարիզչը տալիս է ուսանողներին ընթերցանյութի հղումը և խնդրում, որ գնան ու հիշեն բոլոր քնին վերաբերվող լուծումները, որոնք կարդացել են։

Այդ լուծումները հավաքելուց հետո, մարզիչը առաջարկում է ուսանողներին դրանք դասակարգել երեք դասերով՝
- Համակարգային լուծում
- Բիզնես լուծում (product)
- Գիտական/թեորետիկ լուծում
Սա արվում է Միրոյում, որտեղ մարզիչը լրացնում է ուսանողների տարբերակները (դրանք պետք է համապատասխանեն ուղղորդումներին)։
Ուղղորդումներ
Բիզնես-լուծում՝
- Eight sleep
- Hug machine
- Moondream
- Ծանր վերմակներ
Համակարգային լուծում՝
- Բրիտանացի հեծանվորդների թիմը
Գիտական/թեորետիկ լուծում՝
- Միջավայրային ազդակների կառավարում
- Oքսիտոցին
Հարց-Ամփոփում

Եկե՛ք պատասխանենք երկու կարճ հարցի՝
- Ի՞նչ սովորեցիք այս քննարկում-վարժությունից։
- Ինչպե՞ս կարող եք այն օգտագործել ձեր կյանքում։

Ուղղորդում՝ ինֆորմացիայի դասակարգում, կառուցաողական պատկերացում տվյալների մասին, և այլն։

Մարզիչը բացում է Միրո հարթակը, և գրում ուսանողների հիմնական մտքերը։

Օրվա դերը

Դպրոցից հետո գալու են համալասարանական տարիները, երբ ձեր պատասխանատվությունը նույնպես մեծանում է, և ձեզ պետք է թե՛ ժամանակի ճիշտ կառավարում, թե՛ առողջ քուն։ Այս քունը քննարկելու ենք այս տեսանկյունից։

1. Քննարկում-Վարժություն (շարունակություն)

Թիրախավորվող հմտություններ
Ստեղծագործականություն, Խնդիրների լուծում
Տևողություն՝ 10 րոպե

Առաջադրանքի ներկայացում

Հիշում եք նախկին քննարկման ժամանակ դուրս էիք բերել ձեր ընկերոջ ժամանակի վատ կառավարման, միջավայրի և այլ խնդիրներ, որոնք ազդում էին նրա քնի վրա։

Հիմա արդեն ավարտում եք դպրոցը, սկսում նոր կյանք՝ ավելի շատ պատասխանատվություններով։

Պատկերացրե՛ք, որ ձեր ընկերոջ իրավիճակից ոգեշնչված և իմանալով, որ նրա նման բազում մարդիկ նույնպես հանդիպում են այս խնդիրներին, դուք որոշել եք առաջարկել դպրոցին վերջին կիսամյակում ավելացնել լավ քնի և օրվա ժամանակը ճիշտ կառավարելու դաս։ Այս դասը պետք է նախապատրաստի ուսանողական տարիներին, երբ դուք ավելի լավ պետք է կառավարեք ձեր ժամանակը։

Դպրոցի տնօրենը համաձայնել է, բայց ձեզնից ցանկանում է ստանալ դասի պլան՝ ի՞նչ եք սովորեցնելու ապագա ուսանողներին։

Հիմա, որպես քնի և օրվա ժամանակը ճիշտ կառավարելու գիտակներ, դուք պետք է կազմեք ցուցակ այն ամենի մասին, ինչ սովորեցնելու եք ուսանողներին՝ կենտրոնացումը դնելով խորհուրդների և կանոնների վրա, որոնց պետք է հետևեն։

Հիմա եկեք 4 րոպեում բոլորով արագ կազմենք դա։

Մարզիչը կիսում է Միրոն և սկսում լրացնել ուսանողների խորհուրդները։
Ուղղորդումներ
Որոշ խորհուրդներ՝
- Սահման՛եք առաջնահերթություններ և նախ կենտրոնացե՛ք ամենակարևոր առաջադրանքների վրա։
- Ստեղծե՛ք իրատեսական օրվա պլան հաշվի առնելով, որ նրանց պետք է նաև հանգիստ:
- Բաժանե՛ք մեծ առաջադրանքները ավելի փոքր մասերի, և աշխատե՛ք կարճ ընդմիջումներով։
- Նվազեցրե՛ք ուշադրությունը շեղող հանգամանքները, օրինակ՝ անջատե՛ք հեռախոսը:
- Խուսափե՛ք հետաձգումից, և գործերը շուտ սկսե՛ք՝ վերջին րոպեին սթրեսից և շտապելուց խուսափելու համար:
- Սահմանափակե՛ք էկրանի օգտագործման ժամանակը քնելուց 30 րոպե առաջ։
- Հաջորդ օրվա պլանը գրե՛ք նախորդ օրվա երեկոյան՝ առավոտյան սթրեսը քչացնելու համար:
- Սահմանե՛ք հետևողական քնի ռեժիմ՝ փորձե՛ք քնել և արթնացել ամեն օր միևնույն ժամանակ՝ ավելի լավ հանգստանալու համար:
- Պլանավորե՛ք ընդմիջումներ՝ հանգստանալու և ամբողջ օրվա ընթացքում լիցքավորվելու համար:
- Ձեռք բերե՛ք ֆիզիկական ակտիվություն։ Ներառե՛ք թեթև վարժություններ՝ էներգիան բարձրացնելու և քնի որակը բարելավելու համար:
Հարց-Ամփոփում

Եկե՛ք պատասխանենք երկու կարճ հարցի՝
- Ի՞նչ սովորեցիք այս քննարկում-վարժությունից։
- Ինչպե՞ս կարող եք այն օգտագործել ձեր կյանքում։

Ուղղորդում՝ լուծումներ մտածել իրավիճակի բարելավման համար, և այլն։

Այս վարժությունը Միրո հարթակով ամփոփելու կարիք չկա։

2. Քննարկում-Վարժություն

Թիրախավորվող հմտություններ
Ստեղծագործականություն
Տևողություն՝ 15 րոպե

Առաջադրանքի ներկայացում

Պատկերացրե՛ք, որ ձեր նոր ընդունված համալսարանը՝ հասկանալով քնի կարևորությունը ուսանողների համար, որոշել է ստեղծել քնի սենյակ, որտեղ ուսանողները կարող են քնել ու հանգստանալ օրվա ընթացքում՝ երբ զգում են դրա կարիքը։

Համալսարանը վարձել է ձեզ՝ որպես քնի մասնագետի, որ ստեղծեք այդ սենյակը։

Հիմա ձեզնից յուրաքանչյուրը վերցնում է գրիչ/մատիտ և թուղթ, և գծագրում այդ սենյակը։ Հիշե՛ք ընթերցանյութից միջավայրի պայմանների մասին և ստեղծե՛ք կատարյալ սենյակ քնի համար։

Դրա համար ունեք 3 րոպե։ Ձեր նկարները ուղարկելու եք մեր տելեգրամ չատ։

Մարզիչը պահում է թայմերը և սպասում ուսանողների նկարներին։

Յուրաքանչյուր ուսանող, ով ուղարկել է նկար բացատրում է այն 30 վայրկյան տևողությամբ։ Մարզիչը բացում է նրա նկարը էկրանին, կիսում այն և պահում թայմեր։
Ուղղորդումներ
Միջավայրային պայմաններ՝
- Ջերմաստիճան. ոչ շատ տաք, ոչ շատ ցուրտ՝ 15,6-19,4°C:
- Լռություն․ ականջի խրոցակներ կամ սպիտակ աղմուկի սարք։
- Մթություն․ ցանկացած լույսից խուսափել՝ վարագույրներով կամ աչքի դիմակով։ Ունենալ հեռխոսները ապահով դնելու գոտի։
- Հարմարավետություն․ Լավ ներքնակներ ու բարձեր, փափուկ սավաններ ու վերմակներ:
Հարց-Ամփոփում

Եկեք պատասխանենք երկու կարճ հարցի՝
- Ի՞նչ սովորեցիք այս քննարկում-վարժությունից։
- Ինչպե՞ս կարող եք այն օգտագործել ձեր կյանքում։

Ուղղորդում՝ կարճ ժամանակում նոր գաղափարի ստեղծում, կարճ ժամանակում այդ գաղափարի ներկայացում, և այլն։

Մարզիչը բացում է Միրո հարթակը, և գրում ուսանողների հիմնական մտքերը։

❗MIRO reminder !

3. Քննարկում-Վարժություն

Թիրախավորվող հմտություններ
Քննադատական մտածողություն
Տևողություն՝ 15 րոպե

Առաջադրանքի ներկայացում

Պատկերացրե'ք, որ Կրթության և Գիտության Նախարարությունը ուսանողների քունը երկարացնելու համար որոշում է կայացրել, որ դասերը պետք է սկսվեն ժամը 10-ից։

Եկե'ք քննարկենք մի քանի հարց՝

1․ Սա ճի՞շտ որոշում է։ Ինչպե՞ս ենք հասկանում սա ճիշտ որոշում է, թե ոչ։

2․ Ի՞նչու սա կարող է չազդել ուսանողների քնի երկարության վրա։

3․ Ի՞նչ ռիսկեր կան այս որոշման մեջ։

Ուսանողները կիսում են իրենց մտքերը՝ յուրաքանչյուր հարցի վերաբերյալ առանձին։

Յուրաքանչյուր պատասխանից հետո մարզիչը կիսում է համապատասխան հարցի ուղղորդումը։
Ուղղորդումներ
1․ Որոշելու համար, թե արդյոք լուծումն արդյունավետ է, մենք պետք է հաշվի առնենք և՛ դրա նպատակը, և՛ դրա արդյունքները: Արդյո՞ք լուծումն անդրադառնում է այն խնդրին, որը նախատեսված է լուծել: Օրինակ, այս դեպքում նպատակն այն է, որ ուսանողները ավելի շատ քնեն։ Մենք պետք է հարց տանք՝ արդյո՞ք դա իսկապես լավագույն միջոցն է այդ նպատակին հասնելու համար: Լուծումները գնահատելիս միշտ ուսումնասիրե՛ք նպատակի և արդյունքի կապը։

2․ Այս լուծումը կարող է անարդյունավետ լինել մի քանի պատճառներով՝
- Ուսանողները կարող են այնուամենայնիվ ուշ քնել տնային առաջադրանքների կամ շատ դասերի պատճառով, և ավելի ուշ դասը սկսելը չի փոխի քնի քանակը:
- Ավելի ուշ արթնանալը կարող է հանգեցնել դանդաղկոտության՝ ուսանողներին ավելի հոգնած դարձնելով ամբողջ օրվա ընթացքում:
- Ավելի ուշ սկսելը նշանակում է ավելի ուշ ավարտել, և դասապատրաստումը սկսել ավելի ուշ քան առաջ:
- Եթե ուսանողը պետք է համալսարանում լինի ժամը 10-ին, նա պետք է արթնանա համարյա նույն ժամին ինչ առաջ, քանի որ այս դեպքում նրա ճանապարհը ավելի դանդաղ է լինելու՝ խցանումների պատճառով։ Սա փորձարկվել է Հայաստանում «Այբ» դպրոցի կողմից:
3. Ռիսկերը դիտարկելիս մենք դիտարկում ենք անցանկալի հետևանքներն ու կողմնակի ազդեցությունները, որոնք կարող են առաջանալ: Օրինակ, ավելի ուշ մեկնարկի ժամանակը կարող է խաթարել հաստատված առօրյան կամ ազդել ընտանեկան գրաֆիկի վրա: Բացի այդ, մենք պետք է հաշվի առնել ավելի լայն ազդեցությունները, ինչպիսիք են տրանսպորտային խնդիրները։ Այս քաղաքներից եկող ուսանողները կարող են տրանսպորտի խնդիր ունենալ նոր ժամին տեղափոխվելու հետ։ Կամ համալսարանում աշխատող մարդիկ, իրենց աշխատանքային օրերը պետք է ուշ սկսեն և ուշ ավարտեն։
Հարց-Ամփոփում

Եկե՛ք պատասխանենք երկու կարճ հարցի՝
- Ի՞նչ սովորեցիք այս քննարկում-վարժությունից։
- Ինչպե՞ս կարող եք այն օգտագործել ձեր կյանքում։

Ուղղորդում՝ որոշում կայանցնելուց ինչի վրա պետք է ուշադրություն դարձնել, ինչպես հասկանալ ինչ որ բան լավ է, թե վատ, տեսնել մեծ պատկերը, և այլն։

Մարզիչը բացում է Միրո հարթակը, և գրում ուսանողների հիմնական մտքերը։

❗MIRO reminder !

4. Քննարկում-Վարժություն

Թիրախավորվող հմտություններ
Հաղորդակցություն, Ինքնահասկացում
Տևողություն՝ 10 րոպե

Առաջադրանքի ներկայացում

Պատկերացրե՛ք, որ նախարարությունը որոշել է ընդունել օրենք՝ դասերը առավոտյան 8-ին սկսելու մասին։ Սակայն մինչև այն ընդունելը դուք՝ որպես նախարար, պարտավոր եք համաձայնություն ստանալ համալսարանների դեկաններից։

Դուք գիտեք, որ նրանք դժգոհ են լինելու, քանի որ աշխատանքային օրը շուտ է սկսվելու։ Դա շատ դժվար հանդիպում է լինելու ձեզ համար, և պետք է դրան մտովի նախապարտաստվեք։

1․ Երբ մտնեք սենյակ, ի՞նչ միջավայր ու արձագանք եք ակնկալում։ Ի՞նչ եք զգալու։

Ուսանողները պատասխանում են և մարզիչը կիսում է ուղղորդումները։

2․ Մտավոր պատրաստությունը այսպիսի իրավիճակներում կարևոր է։ Եկե՛ք միասին հիմա մտածեք, որ այս արտահայտությունները թունավորում են մեր միտքը, և մենք պետք է մտածենք հակաթույնը։ Օրինակ՝ բարդ կլինի, բայց կդիմանամ։ Եկե՛ք բոլորի համար այս օրինակով մտածենք մտավոր պատրաստության արտահայտություններ։

Ուսանողները պատասխանում են և մարզիչը կիսում է ուղղորդումները։
Ուղղորդումներ
1․ Միջավայր/արձագանք/զգացում՝
- Դժվար է լինելու
- Չեն լսի
- Միանգամից կմերժեն
- Իմ նկատմամբ կոպիտ կլինեն
- Ինձ կտեսնեն որպես թշնամի
2․ Մտավոր պատրաստություն

Արտահայտությունների օրինակներ՝
- Լսելու եմ բազում մերժումներ, բայց դա նորմալ է
- Ինձ կարող է չլսեն, բայց ոչինչ, այլ կերպ կփորձեմ
Հիմնական գաղափար՝
Եթե նրանք դեմ են գաղափարին, չի նշանակում, որ դեմ են ինձ։

Շատ դեպքերում մեզ թվում է թե մեր աշխատանքին, գաղափարին, արարքին ուղղված քննադատությունը ուղղված է անձնապես մեզ, որը այդպես չէ։ Պետք չէ թույլ տալ, որ դա ազդի ձեր ընկալման վրա։
Հարց-Ամփոփում

Եկե՛ք պատասխանենք երկու կարճ հարցի՝
- Ի՞նչ սովորեցիք այս քննարկում-վարժությունից։
- Ինչպե՞ս կարող եք այն օգտագործել ձեր կյանքում։

Ուղղորդում՝ մտավոր պատրաստում կարևոր հանդիպումների, մերժման ընդունում, անհատին և նրա արարքին ուղղված քննատադությունների տարբերակում, և այլն։

Մարզիչը բացում է Միրո հարթակը, և գրում ուսանողների հիմնական մտքերը։

❗MIRO reminder !